القهوة مفيدة أو هيك ممكن نستنتج من آخر ما اتفق عليه العلم. هي شراب منيح بيفيد الصحة اكتر من ما بيضرها. طبعاً الإعتدال هو السر.
القهوة مفيدة وبتساعدك في تخفيف وزنك.
كيف؟ هالشراب كريم بيعطيكي فوق لزازته تسريع مؤقت لنشاط الأيض أو سرعة حرق السعرات الحرارية. بكلام تاني لما يدخل الكافين الموجود في القهوة جسمك بينشط جهازك العصبي فبيزيد حرقك للسعرات الحرارية ١٥٪ لمدة بيقدروها بتلات ساعات. اذاً ما في داعي لاستبدال القهوة العادية بالأنواع المنزوع منها الكافين إلا ازا الكافين بيقلب كيانك وبتعصبي منه.
القهوة مفيدة لصحتك.
كيف ؟ بيقول د. بيتر مارتن بروفسور الطب النفسي والفارماكولوجي في جامعة ڤاندربيلت انه ”القهوة شراب مفيد للصحة لأقصى درجة.“ في معلومات جديدة غيرت المفاهيم ودعمت صحة هالكلام. القهوة مفيدة لأنها بتقلل حدوث امراض القلب والشرايين والسكري وتراجع القوة الذهنية والموت في سن مبكر. مثلاً دراسة ورجت انه فنجان لتلات فناجين قهوة باليوم بيقلل الاصابة بامراض القلب والشرايين. ودراسة تانية من اليابان ورجت انه اللي بيشربوا القهوة بانتظام كانت نسبة الاصابات فيهم من سرطان الكبد نص عدد الاصابات عند الناس اللي بيشربوا قهوة اقل.
القهوة مفيدة لأنه فيها كمية كبيرة من نوع من الألياف وتركيز هادي الألياف فيها أعلى من تركيزها في عصير البردقان. هادا اللي يمكن بيفسر ليه حصوة المرارة اقل بين الناس البي بيشربوا كتير قهوة، يعني أربع فناجين باليوم.
الزاكرة قصيرة المدى كمان بتنتعش والقدرة على التركيز والانتباه. هيك ورجت دراسة على ناس عمرهم فوق ٦٥ سنة لما اعطوهم فنجان قهوة نص ساعة قبل فحص للزاكرة. ويمكن القهوة تقدر تساعد على الحماية من الزهايمر ومرض پاركنسن. تلات فناجين قهوة مفيدة وقللت تدهور الحالة الذهنية للربع عند رجال فوق ٦٥ سنة وقللت پاركنسن للنص.
بيت القصيد.
القهوة مفيدة ازا بتحبي القهوة. اشربيها بس تجنبي انك تاخدي اكتر من تلات فناجين باليوم. لكن ازا القهوة بتخليكي عصبية او بتسبب صعوبة في النوم وأرق فما تجبري حالك عليها ولا تهتمي لأنك بتقدري تحصلي على نفس المزايا اللي زكرتها من مصادر تانية زي الخضار والفواكه والحبوب الكاملة اللي مش مقشرة.
