شو تعملي للحماية من الشمس والصيف ؟
هالشمس الشمّوسة… منحبها ومنخاف منها!
الصيف والإجازات قريبة ومليانة بوعد الأوقات الحلوة والمشاوير، لكن معه بتيجي حروق الشمس وقرص الناموس وجروح الأولاد لما يلعبوا!
معلش. قوي قلبك… بتقدري تصمدي بشوية معلومات مع كم احتياط وكم غرض من المطبخ والسوق.
إدهني كريم الحماية من الشمس sunscreen إنت وكل العيلة. اختاري كريم بيحمي من الأشعة فوق البنفسجية (أ) و (ب) UVA & UVB ويكون معامل الحماية SPF على الأقل 30. معامل الحماية بيوصف درجة الحماية من الأشعة فئة ب بس. الفئة ب من الأشعة بتسبب الحروق والفئة أ بتدخل لعمق الجلد وبتسرع شيخوخته وظهور التجاعيد. علشان هيك مهم يكون في الكريم مجموعة من المواد إللي بتحمي من الأشعة أ. إقري على العلبة وشوفي إذا موجودة هالمواد وهي: أوكسي بنزون oxybenzone وإيفو بنزون avobenzone وإيكاماسول ecamasule أو عالأقل واحد من العناصر إللي بتمنع دخول الأشعة متل تاني أكسيد التايتينيوم titanium dioxide أو أول أكسيد الزنك zinc oxide. غطي الجلد المعرض للشمس بكرم عالأقل عشرين دقيقة قبل الطلوع من البيت. والأفضل إنو تتخلصي من الكريم القديم الباقي من السنة الماضية وتجيبي علبة جديدة كل صيف علشان تكون الفاعلية أكبر وتكوني فعلاً عم تحتاطي للحماية من الشمس والصيف.
رطبي حروق الشمس بشاي البابونج البارد لأنه إلو خواص مضادة للإلتهاب. وممكن تخففي تقشير الجلد المحروق إزا دهنتي بوريه بابايا papaya على الحرق (بس حطي بابايا في البلندر وشغليها). في البابايا إنزيم إسمه بابين papaine بيساعد في تسريع شفاء الجلد لأنه بيتخلص من الخلايا الميته فبيسمح بنمو النسيج الجديد. وإزا بدك تمنعي الحروق من أصلها وتشجعي العيلة للحماية من الشمس والصيف خلي الكل ياكل بندورة لأنه فيها مضاد للأكسدة إسمه لايكوبين lycopene (صلصة البندورة ورُبها وعصيرها فيها أكبر تركيز). لايكوبين بيحمي من الأشعة فوق البنفسجية لأنه بيحيد الشحنات الحرة المؤذية.
بردي حبوب الحرارة بالنعنع. في الشمس والحرارة بيسد العرق والغبار والزيت قنوات غدد العرق تحت الجلد فبتظهر حبوب حمرا وبتحك. استعملي شاي النعنع (peppermint) بشكلين … ممكن تشربيه وتبوردي وممكن ترشيه عالجلد علشان يبرد المنثول الموجود فيه الجلد ويخفف التهيج. بعد الشاي نشفي المنطقة بلطف ورشي عليها بودرة الأطفال أو نشا الذرة.
إحمي شعرك من الشمس. ممكن تسبب الأشعة فوق البنفسجية الأذى لشعرك خاصة إذا كان مصبوغ أو إذا كنتي بتملسيه أو بتنشفيه دائماً بالسشوار. بتضعف وبتكسر الأشعة فوق البنفسجية الروابط بين البروتينات الموجودة في مادة الشعر وممكن كمان تخلي لون الشعر باهت. كمان حرارة الشمس ممكن تضعف الطبقة الخارجية للشعر وتسبب نشفانها فبيصير الشعر خشن و”مكنفش”. لكن هلق صار في ملطف للشعر conditioner بداخله واقي ضد الشمس sunscreen. استعمليه أو ممكن تدهني قناع ماسك mask أو ملطف عادي للشعر فوق شعرك وتمشطيه بأصابعك لما تنزلي لشط البحر أو بركة السباحة. وما تنسي إنه برنيطة كبيرة ممكن تحمي شعرك ووجهك من الأشعة المؤذية.
ريحي حالك من حكة قرصات الناموس وادهنيها بمعجون الأسنان. بتعرفي ليش قرصة الناموس بتحك؟ البزاقة هي السبب. بتغرز الناموسة لعابها تحت الجلد لما تقرص وهدا بيخلي الجسم بفرز هستامين histamine كجزء من عملية الدفاع والهستامين بيسبب حكة وورم. إدهني معجون الأسنان على القرصة فأنواع المعجون اللي فيها منثول (نكهة النعنع) بتريح الأعصاب الموجودة في الجلد اللي اختصاصها الإحساس بالحرارة فبتبورد الجلد وبتخفف الحكة. وفي معجون أسنان فيه مضاد للبكتيريا إسمه ترايكلوسان triclosan جربيه لأته بيخفف ورم مكان القرصة.
ملقط الحواجب مفيد لقرصة النحل. اسحبي الدبر بملقط الحواجب أو أكشطيه بأضفرك وإوعي تعصريه. حطي تلج عالمنطقة وإزا القرصة في الدراع أو الساق إرفعيها لفوق. للوجع أعطي اللي انقرص حبة بنادول أو أيبوبروفن وللحكة أعطيهم مضاد للهستامين أو ادهني القرصة بمعجون حضريه من شوية ميه مع بايكربونات الصودا (آه، تبعة الخبيز!) أو استعملي لوسيون كالاماين.
إشفي الجروح بالعسل وكم كلمة حلوة (معسولة) تطمئن. إذا انجرح واحد من الأولاد نضفي الجلد حوالين الجرح بالصابون واغسليه بالمية الدافية علشان تقللي من احتمال التهاب الجرح وبقاء علامة دائمة مكان الجرح (ندبة). بعدين غطي الجرح بالعسل وضماد (بلاستر). العسل مزبوط بدبق لكن فيه مواد مفيدة ضد الجراثيم وضد التهيج.