أرشيف الوسم: أسباب خطأ فحص الحمل

نتيجة فحص الحمل غلط

فحص الحمل بالبيت هوّن الأمور على الستات، بس أحياناً ممكن يقلق الست إذا شكّت إنه نتيجته غلط.
ممكن تكون النتيجة غلط؟!!!
شهقة كبيرة…
الجواب: للأسف نعم ممكن تكون غلط.
والنتيجة السلبية غلط أكتر شيوعاً من الإيجابية غلط.

إحنا منسمي النتيجة إيجابية لما نعني إنه في حمل، والنتيجة سلبية لما نعني إنه ما في حمل.
قبل ما نقول إيمتى بتطلع النتائج غلط، خليني أطمنكم إنه تناول الأدوية مسكنات الألم وحبوب منع الحمل والمضادات الحيوية ما بيسبب نتائج غلط.

أسباب النتيجة السلبية الغلط لفحص الحمل

قلة صبرك – في أول الحمل هورمون hCG بتكون كميته قليلة وبتزيد بشكل سريع مع الأيام. هادا الهورمون الموجود بالبول أو الدم  هو اللي بيخلي فحص الحمل يطلع إيجابي، فإزا كانت بصلتك محروقة وعملتي الفحص دغري بعد ما فاتتك الدورة أو قبل ما تفوتك ممكن تطلع نتيجة الفحص سلبيةحتى لو كنت حامل فعلاً. علشان هيك بنصحك إنك تصبري حتى يمر أسبوع بعد موعد الدورة فإزا ما إجت إعملي فحص الحمل على البول.
قلة صبرك … مرة تانية – إزا نزل البول على شريط الفحص بس ما استنيتي المدة المطلوبة حسب تعليمات الفحص ممكن ما تظهر النتيجة الإيجابية. إقرأي ورقة التعليمات الموجودة في علبة الفحص واتبعي التعليمات بدقة وإزا احتاج الأمر ممكن تستعملي المنبه أو ساعتك لتحديد المدة الكافية قبل قراءة نتيجة الفحص.
إزا البول خفيف مش مركز ممكن كا تطلع النتيجة الإيجابية. علشان هيك أحسن وقت للفحص هو أول ما تصحي من النوم الصبح لأنه في هادا الوقت بيكون البول مركز أكتر.

أسباب النتيجة الإيجابية الغلط لفحص الحمل

هادي ما بتحصل كتير وأسبابها متعددة.
قلة صبرك … مرة تالتة! – إزا كنت ماخدة أدوية لتنشيط الخصوبة وتحريض الإباضة وعملتي الفحص بعد مدة قصيرة ممكن تطلع النتيجة إيجابية مع إنه ما حصل الإخصاب والحمل. والسبب إنه بعض العلاجات بتحتوي على هورمون hCG فالنتيجة إنه الفحص رح يكتشف هورمون hCG في بولك اللي إجى من الدوا اللي أخدتيه ومش بسبب وجود حمل.

بعض المشاكل الصحية متل السرطان ممكن تخلي الفحص إيجابي بدون وجود حمل. السبب إنه بعض أنواع السرطان ومش كلها زي أنواع من سرطان المبيض وسرطان المشيمة choriocarcinoma بعد انتهاء حمل سابق بتفرز هورمون hCG اللي بيخلّي فحص الحمل إيجابي بالغلط.
حمل الأنابيب ectopic pregnancy أو الحمل الهاجر بيخلي الفحص إيجابي بس بيكون الحمل في المكان الغلط خارج الرحم وغير قادر على الإكتمال وممكن يهدد حياة المرأة إزا ما اكتُشف بكير وتم إيقافه أو إزالته.
الإجهاض المبكر فأحياناً تُخصب البويضة وبتغرز حالها في بطانة الرحم بس ما بيستمر نمو الجنين المتناهي في الصغر وبيموت حتى قبل ما يتشكل جسمه أو ينبض قلبه لكن الخلايا اللي بتفرز هورمون hCG بتبدأ تشتغل فبيطلع فحص الحمل إيجابي ومنسمي هادي الحالة حمل كيماوي biochemical pregnancy.
إزا شكّيتي بنتائج فحص الحمل بالبيت زوري عيادة طبيبة النسائية والتوليد وهي ممكن تعمل فحص إضافي متل فحص الدم مثلاً للتأكد.